上文提到，羽毛球場上，兒子失了球，媽媽在旁為他打氣，想攬住兒子卻被推開，兒子情緒久久未能平復。羽毛球教練為了調停狀況，為母子傳話。

一、媽媽的話

林sir，你講句公道說話。我唔似得其他家長呀，我身體力行，花錢之餘，仲花時間陪住個仔行成長嘅每一步。學校嘅所有活動，佢所有嘅興趣班，可以嘅我都參與。我希望了解個仔嘅一切，佢讀書成績點樣可以好啲，打波點樣可以進步啲，彈琴點樣可以投入啲。我從來都冇俾壓力佢，佢成功我讚佢，佢失敗我鼓勵佢，陪佢一齊搵方法解決。

唉！近年佢越嚟越難攪，講唔夠幾句，小小事就發大脾氣，或者唔啾唔睬。問十句答一句，反叛期吖嘛，青春期荷爾蒙唔平衡吖嘛，我都明白，我都忍讓（眼圈開始紅），但又有邊個明白我嘅付出！

二、兒子的話

我知阿媽錫我。但係佢真係越嚟越煩，我真係頂佢唔順。佢無時無刻都係我身邊，我做所有嘢，乜嘢佢都要加把嘴，講埋啲冇用嘅嘢，佢把聲又尖，我聽到佢把聲就頭痛！

點解佢唔可以好似其他啲阿媽咁去咗返工，或搵番佢自己啲朋友，等我可以靜下！佢而家全方位入侵我嘅生活，我比啲friend笑，話我係mammy’s boy，叫我返屋企搵阿媽！

三、阿Sir的話

「清官難審家庭事」，各說各有理外，當中仲夾雜咗「愛」，同「我做一切都係為你好」呢啲高尚情操，攪到件事更加複雜，更難定對錯！

＊＊＊

愛護孩子的家長都有一個共通點，就是在自己能力範圍以內為孩子提供「最好」，爸媽用自己的尺，去量度為孩子準備的「最好」，以自己的意願去成就孩子。可是，當孩子心中的最好和意願，與父母心中的最好和意願，出現落差、分歧的時候，應該以誰的最好和意願為依歸？絕大部份的時候，父母會認為自己的識見和歷練一定比孩子廣，所做的決定一定比孩子正確；於是，孩子長期成為輸家，積壓久了，他總有辦法讓爸媽知道他不開心，從情緒和行為發洩不滿。就像以上的兒子一樣，把球拍摔斷，狠狠的發脾氣，而媽媽卻仍在霧中，不明所以。

突然想起 Vanessa Mae。這位譽滿全球的小提琴家，與她母親的恩怨情仇，跟其音樂成就同樣峰迴路轉。筆者記得這位虎媽曾經說過，她為世界成就了傑出的音樂家，自己卻失去了女兒！她們的故事當然是極端了些，但道理其實一樣。爸媽們必須要調節、放下自己心中的尺，了解孩子的想法，尤其是當孩子漸漸長大，他們需要空間去嘗試、去體會、去做錯、去修正。請讓孩子學習成長。

若是真的遇到困難，嘗試找一位你信賴的親友，當孩子的Ｍentor（人生導師） ，透過第三者，放下一些情意結，把關心和經驗傳遞。


為作者讚好︰ 點擊前往

Aunty Anne 解憂信箱︰ 點擊前往 （歡迎師長就父母子女疑難來訊提問，亦歡迎師長來訊感想）

圖片來源︰由作者提供

【本文經Aunty Anne同意轉載，歡迎到訪作者專頁了解更多】