28 12月
長假期，閒來網上看了2006年軟硬天師的訪談，兩位公認聰明有計的男人，談到自己的家庭，作為丈夫、父親與家庭的關係，風趣幽默，精準扼要！再一次引證，無論你是誰，家庭成員之間的分歧，萬變不離其宗；重點在於，你如何面對，如何處理，如何放下！
筆者盡量原文節錄他們的講話，大家想原汁原味的話，網上不難找到。
林海鋒（林） 葛民輝 （葛） 主持人 （主）
主：「你喺屋企係扮演咩角色？魔鬼定係天使呢對兩位千金？」
林：「我開頭摸索緊，當佢哋少少懂嘅時候⋯通常會發生，我做鬧嗰個，我做乖嗰個，到咁上下發覺，我兩個都冇做⋯因為裏面有一個社會秩序，我係進入唔到嘅，同埋都唔應該去進入，萬一進入嘅時候，就會破壞咗⋯我係屬於客串嘅性質⋯因為太太投資嘅時間同埋精力係好多，以我局外人嚟睇，都幾準確下，我好信任佢⋯無論衣食住行呀，照顧⋯唯獨係完全冇理過我嘅感受⋯咁所以我要自己靠自己，出去做多啲嘢，唔係去搵錢，而係去生活，搵返啲感覺返嚟。」
葛：「屋企有女人好多⋯阿媽、婆婆，細細個成日睇住佢哋⋯唔俾出街玩，我成日困系屋企，咪睇到個system點行，成個制度⋯你千祈唔好搞佢哋個廚房⋯知道原來佢投資咗幾多時間放喺廚房度，你就算攞杯水，你一係就睇清楚佢點攞，個手續係點，過程如何，千祈唔好自把自為插入去就覺得，我可以咁樣斟水，唔得㗎⋯」
林：「會出事㗎！」
葛：「會出事㗎，會反車㗎！」
林：「我試過星期日，喂喂今日等我嚟揸主意，嘩，嗰日就係悲劇嘅開始，亂晒所有，嘩嘩，然後大悲劇發生，最尾係沖天大火災，以後咪搞！ 以後星期日，下一個通告係幾點，喺邊度集合呢⋯」
葛：「有系統㗎！」
林：「我跟你，我跟車，ok 冇問題，劇本喺邊，對白照講，拜拜。係咁樣。」
主：「咁你喺個仔面前，扮演咩角色？」
葛：「兄弟！我同個仔係兄弟⋯我係細佬，只不過係多咗個仔去搶咗我條女咁囉，咁死啦，冇咗條女添，因為佢嘅Focus擺晒喺佢度，咁好嘅，自己扮演嘅角色咪係，佢媽咪唔俾佢做嘅嘢，我專叫佢做，咁我就開心啦⋯可能我哋相聚嘅時間少，工作狂嚟㗎嘛，一個禮拜可能只見一日⋯ 想踢波啊，得，引開佢阿媽，帶佢去踢，踢到泥鴨咁樣⋯佢令我好似多咗個friend咁樣，做一啲我覺得啱，可以做嘅事。」
主持人：「其實你幫佢挑戰制度！」
葛：「久唔久要鬆下嘅，男仔嚟㗎嘛，應該係要咁做。」
～～～～～～～～～～～～～～～～～
系統、制度、角色、局外人，都是家庭治療的常用術語。聰敏的軟硬，看透了家庭關係的運作，硬闖之後，調節之後，找到讓自己、讓家人都可以舒適過活的位置。可以怎樣調節，下星期再詳細分析。