聖誕後與女友人相聚,她一臉煩惱,說13歲的女兒,強烈要求與朋友仔到海旁參加除夕倒數派對。
「俾唔俾佢去好呢?」她不斷問⋯
「佢話最friend 嘅朋友都去,我又點可以唔俾佢去呢!」⋯
「但係去除夕倒數,即係要12點後先至返屋企,佢咁大個都未試過自己去到咁夜!嗰晚人又多又亂,我真係唔想!!」⋯
「點算好呀!!!」
腦交戰過後,還是要做個決定。由她去不由她去,都不是簡單的一句!需要清楚解釋,更加要留下後續。
13歲的孩子剛剛升呢為teenager,覺得自己長大了,係時候爭取更多自由自主,本是正常不過,父母亦有責任好好裝備孩子,為自己放心、為孩子安全、為彼此學習離家做好準備。
每個家庭的狀況不一,各有不同的考量!
決定不由她去的話,首先要溫柔一點,多些由女兒自身安全角度分析,例如,「omicron 病毒擴散,最近有啲危險噃,除夕倒數派對始終人太多喇」之類,千萬別單單只由母親的角度出發,「媽媽會好擔心你㗎」,或者霸道的「我唔俾你去總有我嘅理由」。因為對女兒而言,這些根本不是足夠的理據。去不得已經夠不高興了,再聽這些只會令她更加反感,肯定不歡而散。
夠信心的話,便為大家設下期限,譬如明年除夕,而這段期間大家可以立約,合作找出一個令家長安心、讓孩子接受的去街模式,逐步為將來單獨外出做好準備。
若不想令女兒失望,認為遲去早去,總是要由她去的話,便是設下規範,講掂數的機會!
這時媽媽當然可以講出自己其實有多擔心,但願意相信女兒可以負責任地外出,在「總要設下小小規矩」的情況下,首先可以先問清楚同去的朋友仔姓甚名誰,然後訂定回家的時限,更可以要求女兒留下同去的朋友的聯絡電話,應承萬一找她不著,又過了時限,才會致電她的朋友。
清晰的做好規範和期望管理,讓大家都知道對方的底線,講明今次是先導計劃,效果理想的話,才有下一次。
筆者時常鼓勵,家長必須對孩子的朋友圈有所認知,最理想當然係可以見過面,親自了解小朋友及其家庭背景;多些組織參與家長之間的活動,做好網絡連繫,不單止有助收風,更可以從另一個層面認識孩子的社交狀況。這些珍貴的資料,絕對有助了解孩子的成長需要,於適當的時候為孩子解惑解困。
教仔本來就是繁複瑣碎,長路漫漫!若果演繹之中可以添加一點幽默感,讓説教變得輕鬆一點,活潑一些,教的受的便都可以更加享受過程,減輕教養過程的負擔!
#教仔真係好累
#累都要做
#輕鬆活潑一啲大家都好過


為作者讚好︰ 點擊前往

Aunty Anne 解憂信箱︰ 點擊前往 (歡迎師長就父母子女疑難來訊提問,亦歡迎師長來訊感想)

圖片來源︰由作者提供

【本文經Aunty Anne同意轉載,歡迎到訪作者專頁了解更多】