07 10月
疫情關系，工人姐姐完約後被另一個東家高薪挖角，本地滿約的見了幾個又不合心意，從外地請新人又怕健康有虞。拖拉了幾個月，全職媽媽覺得基本上都捱得過，再加上孩子們都已經上小學了，考慮向高難度挑戰，捲起衣袖自己家務自己做，順便訓練孩子自顧。就算是有工人的日子，媽媽亦有落手落腳煮食和照顧孩子，因為她認定工人處理得不夠仔細。一向都堅持把家裡打理得井井有條、一塵不染的她，以前帶著工人，還不是要勞心勞氣。於是她心想，只要老公和孩子們上下一心，應該可以應付得到。
於是她把日程表看了一遍，盤算著如何可以減低工作量，例如凍肉和水果可以向商舖落單，直接送到家門，每星期只到街市超市各一趟購買蔬菜和糧油雜貨，應當足夠；老公返工前可以送孩子上學，自己集中清潔、洗燙、煮飯等等，一切都依她的意願安排妥當！
一個月後，她向親友訴苦説「我好崩潰啊！邊個夠我惨！！」
「我所有嘢都安排妥當，但係佢哋總係唔合作！阿仔阿女朝朝都唔肯起身，刷牙洗面換衫全面慢動作，我趕住煮早餐，老公又叫佢哋唔聽，結果我幾乎耍咆哮，先會快少少，趕得切出門口唔使遲到！」
「細嘅唔聽都算，最慘嘅係大嗰個，做嘢實在求其！淨係叫佢朝頭早送返學，同埋夜晚幫手洗碗啫，有咁難咩！朝早搞唔掂啲細路都算，夜晚食完飯由執碗開始，餸汁滴到一地都係，我就開始要跟佢啲手尾；碗洗唔夠乾淨唔在講，抹又抹唔乾；每晚都洗漏一隻煲兩隻蓋；鋅盤永遠留低餸菜殘渣，會惹曱甴㗎嘛；一係唔記得掉垃圾，記得掉又唔記得舖番垃圾袋。我要好似緝私隊咁，喺佢背後盯實每一件佢做漏嘅嘢，仲辛苦過自己做！」
「明明啲嘢做到甩甩漏漏，唔好好比心機做好啲，仲要多多辯解，一陣話佢都未做完，一陣又話遲啲會做，死剩把口。」
「講好咗分工合作，但係，最後終於都係得我自己一個人做哂。我對手做到粗過地盤工人，周身酸痛，佢一啲關心、問候都冇，仲話係我揀㗎 ！佢有提過我冇工人搞唔掂！ ！咁係咪我作賤自己呢？！」
從對話之中，反映出這對夫妻在是否繼續請工人這個問題上，其實是各持己見的。太太自我感覺良好，自以為一切已安排妥貼，只需要丈夫孩子們跟着做便可以了。丈夫明顯知道太太要求甚高，自己無論如何都不能夠達標，所以曾經提出過不可能不用工人，但太太已經決定了的事，又豈會為他的三言兩語而改變！丈夫雖然勉強依從了太太的安排，但始終不服氣，於是又被教訓的時候，丈夫雖然明知結局，仍憋不住氣回應兩句，最後被駡得更凶 ，那還有心情去關心她的腰酸背痛！
久而久之，丈夫會將太太「唔啱聽」的說話收在心底，以沉默抗議，或者採取「每事問」的模式，問清問楚太太的意見才敢行動，例如於超市購物後是否用5毫子買個膠袋之類，都要徵詢過老婆的意見。結果換來老婆反著眼說「係咪低能㗎」的揶揄。
然後，太太漸漸覺得丈夫對自己冷淡，夫妻感情疏離，同床異夢，「百思不得其解」。可惜的是，以這個模式相處的夫妻，比比皆是！大家都活得不順意，萬分無奈。
希望這段文字能够為處於類似境況的夫婦們作參考和提醒，為尚未冰封的關係儘快解凍。否則每位成員都會受到傷害，悔不當初。
與各位共勉！