23 5月
我個名叫Marcus，今年六歲，剛剛升K3，我屋企有爸B同埋有媽咪，媽咪好錫我，我好中意媽咪。
其實，我都好鍾意爸B，好鍾意同佢玩。但係佢好忙，成日去咗返工，媽咪話我哋好似單親家庭咁無爸B㗎。不過我唔係好明，爸B無論幾忙，佢朝早都一定車我返學，同我傾偈陪我講笑，我好中意爸B車我返學。
由細到大，媽咪都同我講，我一定要俾心機返興趣班、補習班同面試班，咁先可以考入直資小學，and then會入到好嘅中學，然後and then就會讀到間好嘅大學。所以直資小學好重要。但係，我都唔係好明，因為爸 B 成日同我講，輕鬆啲，開心就得啦。
我唔明點解啲興趣班越上越多！有時我真係覺得好攰，唔想練琴，唔想考琴；唔想練跆拳道，唔想考跆拳道，乜都唔想練，乜都唔想考，淨係想乜都唔做，同埋休息下。咁但係媽咪就會唔開心，話我扭計，佢話佢都係為咗我好，話其實佢都好攰。媽咪有時會喊，問我信唔信佢，我話信，媽咪就叫我聽話。佢有時會好大聲咁叫我聽話，我有時好驚，但我唔想媽咪唔開心，所以我唔再講，然後聽佢話。
然後爸B同我講，佢會同媽咪傾吓，但係通常佢哋都會傾得好大聲。
有時，朝早我好攰，唔想起身，我知道媽咪會唔開心，但係我真係好攰，然後媽咪就會叫爸B搞掂我，爸B就會俾我瞓多5分鐘，然後佢會㘉醒我，同我玩一陣再抱我去廁所。通常媽咪都會好嬲咁話「仲玩，夠鐘啦」，但係我同爸B都會偷偷地玩多一陣。
有一日，爸B車我返學嘅時候，問我係咪好攰，我話ok啦，爸B就話直資小學雖然好好，但未必一定適合我，所以只要我盡力就可以，唔使俾自己咁大壓力。但係我唔明媽咪話直資學校好好，我一定要讀到喎，點解爸B話未必適合我？究竟我應唔應該讀直資小學呢？
之後，我就聽到爸B同媽咪鬧交，今次鬧得好大聲，鬧咗好耐。
爸B：「老婆你係唔係癲咗？！20間？！你有冇諗過個仔頂唔頂得順？！」
媽咪：「咁你有冇諗過，我頂唔頂得順！一切都係我諗，乜嘢都係我安排，你做過啲乜嘢？！淨係叫你到時到侯出現去interview，癲喺邊度？我話你知，個仔入唔到間好嘅小學，我到時仲癲！！」
20 間小學？！係咪因為我唔叻，媽咪驚我冇書讀？係咪因為我唔乖，爸B媽咪為咗我鬧交？？
嗰晚我好難先瞓得著，然後發咗啲好驚嘅夢，我成晚比怪獸追，啲怪獸周圍都係，我係咁叫救命，最後醒咗，弊啦！我竟然喺床度pee pee！！！我係咪變返BB咁冇用？！
～～～～～～～～～～～～～～～～～
在大人的世界裏，父母都以為自己盡力保護孩子，為孩子做到最好的安排。而事實上，孩子同時努力保護父母，希望達到父母的期望，讓父母為自己的成就感到開心。
當父母對孩子的的期望有分歧，例如媽咪誓要把Marcus送進直資小學，把自己和孩子都迫緊了，爸B自然會把事情淡化放輕，生怕自己一樣緊張的話會把孩子迫瘋。但這樣媽咪便認為丈夫不認同自己的努力，繼而演變成為夫妻之間的矛盾源頭。
Marcus對父母和家庭都非常關心，父母的情緒和關係的微妙變化，家庭氛圍的風吹草動，都叫他擔心煩惱。Marcus 這孩子懂事又多慮，當媽咪覺得爸B 忽略了家庭， Marcus卻懂得感激爸B每朝無間斷的送他返學。敏感的Marcus無可避免地被捲進了父母的矛盾漩渦，他的一大堆問題和疑惑，皆來自父母的背道而馳。大人都處理不來的問題，小孩子卻會奮不顧身的全力調停；壓力大到尿床是重要的警號！
真正愛護孩子的父母，在教養孩子這環節上，請放下你的一定和必須。有時把說話講得太實太死，便失去了轉彎的餘地。想孩子入直資無問題，同時有個plan B作兩手準備，萬一失敗了，這個後備方案便可以讓大家安心，把擔心、焦慮減到最低，一家三口同心同德，輕鬆面對選校這個大難題。